Kryetarja e komisionit hetimor për inceneratorët, Jorida Tabaku ka postuar në faqen e saj në Facebook vendimin e Këshillit Bashkiak të Durrësit të vitit 2020, ku sipas saj i jepet leja për të negociuar nënkryetares së bashkisë me kompaninë e inceneratorit Tiranë.
“Përditë bëhet më e qartë përse socialistët bllokuan hetimin për aferën e inceneratorëve në Komisionin Hetimor. Ato duan të mbulojnë provat për grupin të strukturuar kriminal që ende sot e kësaj dite merr nga xhepat e shqiptarëve miliona euro. Të tre inceneratorët nuk punojnë ne kapacitet të plotë dhe qeveria është ngritur në këmbë t’i “krijojë” punë, sidomos atij te Tiranës”, shkruan ajo.
Tabaku thotë me tej se rezultati i kësaj negociate ishte një tender pa konkurrim me vlerë 10 mln euro, duke i kërkuar edhe njëherë SPAK që të bëjë si duhet punën e tij dhe të mos mbrojë më kriminelët.
“Të gjithë i mbajmë mend pamjet se si në mes të sezonit turistik plehrat digjeshin në çdo qytet për qëllime kriminale. Pra, për t’i detyruar bashkitë të paguanin tarifën e “inceneratorit”, pra qytetarë të paguanin me tarifë megjithëse më herë kanë paguar nga buxheti i shtetit me taksa! Kështu ka ndodhur në Tiranë por edhe në Durrës. Shihni vendimin e Këshillit Bashkiak të vitit 2020, ku i jepet leja për të negociuar nënkryetares së bashkisë me kompaninë së inceneratorit Tiranë. Rezultati i kësaj negociate një tender pa konkurrim me vlerë 10 mln euro”, shprehet Tabaku.
Deputetja e PD ka denoncuar vazhdimisht me dokumenti shoqëruese abuzimet që po bëhen nga qeveria me inceneratorët, madje ja ndjekur një rrugë ligjore për hetimin e të përfshirëve në këto afera.
