Deputetja demokrate Jordia Tabaku ka bërë thirrje që deputetët të bëhen bashkë në votimin pro rezolutës që dënon gjenocidin serb në Srebenicë.
Tabaku tha se dënimi i gjenocidit nderon parlamentin, deputetët dhe shqiptarët, teksa bëri thirrje që rezoluta të kalojë me 100% të votave.
“PD vjet në korrik prezantoi idenë e një rezolute për dënimin e gjenocidit. Historia e trishtë e kombit tonë duhet të jetë një leksion. Nuk e kuptoj si parlamenti i Shqipërisë vetëm sot miraton një rezolutë për dënimin e gjenocidit serb në Srebrenicë. Duhej të ishte miratuar kohë më parë. Si një shenje e qartë e dënimit të ideologjisë shoviniste. Ky hap nderon parlamentin e Shqipërisë, ne si deputetët dhe shqiptarët. Ky nderim është i mangët. Nuk janë paraqitur të gjithë elementët si në rezolutat e Kombeve të Bashkuara apo kombeve të Europës. Mundet që kjo rezolutë të jetë e paplotë nëse nuk fillon me dënimin e gjenocidi serb në Srebrenicë. Për mua është jashtë çdo realiteti që të kërkojmë llogari për dënimin e këtij gjenocidi nëse nuk jemi të parët që nuk e dënojmë. A kemi ne luksin si komb që mos të dënojmë krimin që forcat serbe bënë mbi 8 mijë boshnjakë? Nga kjo foltore ju kam kërkuar të mos votoni ligje, koncesione, kontrata, kjo çështje është ndryshe, duhet të na bëjë bashkë, duhet të ketë 100% të votave. Është e trishtueshme kur sheh se individë të caktuar kanë një vullnet të madh për të mohuar krimet. Mos të gabojmë me këtë rezolutë. Nuk e kemi luksin të mos reflektojmë atë që kanë reflektuar parlamentet e tjerë. Kjo sallë duhet të ngrihet mbi palët në emër të qindra grave të përdhunuara mizorisht nga forcat serbe, të nënave që panë me sy varre masive, duhet ta dënojmë këtë krim. Nuk duhet të lejojmë që e shkuara të harrohet”, tha Tabaku.
