Kryetarja e Komisionit Hetimor për inceneratorët, Jorida Tabaku, tregoi sot se kanë ngritur padi ndaj institucione që nuk dhanë informacion për inceneratorët. Sakaq, ajo ka bërë të ditur emrat e të gjithë enteve, duke filluar Bashkia Tiranë, Agjencia e Mjedisit, te Tatimet dhe disa ministri.
“Një javë më parë pasi u mbajtën dy javë nga sekretarja e komisionit, janë nisur disa shkresa me datën 04.02.2022 për; kryetarin të Bashkisë së Tiranës, z.Erion Veliaj, ministres së Mjedisit znj.Mirela Kumbaro, ministres së Infrastrukturës znj. Belinda Balluku, ministres së Financave dhe Ekonomisë znj. Delina Ibrahimaj, sekretar i Përgjithshëm i Këshillit të Ministrave z.Engjell Agaçi, drejtore e Përgjithshme e Agjencisë Kombëtare të Mjedisit znj. Arta Dollani, drejtor i Përgjithshëm i Tatimeve z.Ceno Klosi, drejtore e Përgjithshme e Qendrës Kombëtare të Biznesit znj. Pranvera Fagu, z.Arben Shehu kryetar i KLSH-së, znj.Brunilda Lilo avokate e Përgjithshme e Avokaturës së Shtetit dhe znj.Ledia Tota drejtor e Përgjithshme e Agjencisë së Zhvillimit të Territorit.
Dua të njoftoj komisionin se sot 7 ditë pasi janë nisur, 5 ditë punë dhe 7 ditë kalendarike nuk kemi përgjigje. Do t’i kërkoja ekspertëve të komisionit dhe specialistëve të komisionit të ngrenë një padi për këdo që nuk kthejnë një përgjigje brenda kohës”, tha Tabaku. Ndër të tjera Tabaku tha se këto institucione kanë mohuar qëllimisht dhënien e informacionit për të penguar hetimet.
