Këshilli i Integrimit Europian ka zhvilluar një mbledhje paraditen e sotme, ku përveç bashkëdrejtuesve, Taulant Balla dhe Jorida Tabaku, ka qenë e pranishme dhe ministrja Olta Xhaçka.
Në fjalën e saj, Tabaku tha se Shqipëria nuk mund të fshihet pafund pas vetos bullgare për Maqedoninë, dhe duhet të bëhen më shumë hapa para sa i takon luftës ndaj pastrimit të parave dhe korrupsionit.
“Mund të punohet për kapitullin e Reformës në Drejtësi, por është e kotë kjo reformë, ku në luftën ndaj korrupsionit nuk kemi sukses. Unë ju inkurajoj ju që të ulemi dhe të gjejmë një mënyrë që metodologjinë e re ta kthejmë në avantazh. Do të kisha dëshirë të fokusohemi në pushtetin lokal. Nga informacionet që kemi, në shumë prej bashkive nuk janë ngritur shtabet e integrimit. Kështu ndodh edhe në strukturat në ministri. Jam përpjekur gjatë gjithë kohës t’i ngre këto dyshime. Të gjithë kanë emëruesin e përbashkët: Vullnet politik. Ne nuk mund të fshihemi pas vetos së Bullgarisë, duhet të bëjmë punën tonë këtu, të ecim përpara dhe pavarësisht një date që ndoshta nuk është në dorën tonë”, tha Tabaku.
Ndërkohë që ministrja Xhaçka tha se Shqipëria e ka dëshmuar se është një partner i rëndësishëm për BE-në, dhe se për momentin procesi i integrimit është bllokuar nga Bullgaria.
“Shqipëria ka bërë hapa para në të gjitha kriteret, arritjet tona janë vlerësuar nga të gjitha vendet anëtare të BE. Ne do të vazhdojmë rrugën tonë drejt anëtarësimit me të drejta të plota, Shqipëria i ka plotësuar kushtet për të mbajtur konferencën e parë ndërqeveritare. Viti 2022 ka nisur me të njëjtin ritëm, me objektivin afatshkurtër, që brenda këtij viti të mbahen konferenca e parë ndërqeveritare, nuk do të rrimë duarkryq“, tha Ministrja Xhaçka.
