Nënkryetarja e Partisë Demokratike, Jorida Tabaku, tha se gjatë Kuvendit Kombëtar të thirrur këtë të shtunë, do të merret vendim për t’u futur si standard precedenti i krijuar nga pezullimi i Sali Berishës nga grupi parlamentar i PD-së, pas shpalljes “non grata” nga Shtetet e Bashkuara.
Ajo u bëri thirrje anëtarëve të PD-së që mbështesin zotin Berisha, që të kthehen në rrugën institucionale.
“Nuk e meritojnë demokratët të jenë të ndarë, jo përballë njëri-tjetrit, por përballë qeverisë. Të gjithë ata që janë të përfshirë në palën tjetër janë ish-funksionarë të partisë dhe e dinë si funksionon ajo. Partia nuk është njësi guerile… Sot ka vetëm një parti, me institucione. Thirrja ime vijon të jetë që të jemi bashkë. Kryesia është shumicë, kryesia është shumicë, edhe Kuvendi Kombëtar do të jetë shumicë. Sot miratojmë një rezolutë që vendimi i marrë për Berishën të bëhet standard për rastet e tjera. Nuk ka përjashtime, as shkarkime. Është një kuvend ku duhet të reflektojmë thellë. Ne themi që do të ketë një vendim që në të ardhmen, nëse do të ketë vendime të tjera të tilla, nuk mund të jenë në Këshillin Kombëtar të PD-së, kryesinë apo grupin parlamentar, individë që janë “non grata”. Ky është një standard që duhet respektuar”, tha Tabaku.
