Mediat e Italisë publikuan mbrëmë vonë foto të një ngarkese droge prej gati 2 tonësh kanabis sativa që ishte zbarkuar në portin e Manfredonias, komunë e Foggias.
Droga u sekuestrua gjatë një superoparacioni i cili ka zgjatur për rreth 5 orë për ndalimin e gomones dhe është realizuar me pjesëmarjen e tre shteteve Itali, Shqipëri dhe Mali i Zi me mbështetjen ajrore të Frontex.
Skafi ishte konstatuar nga rojet bregdetare të Malit të Zi, dhe pas alarmit ndjekja ka vijuar në ujërat bregdetare të Detit Adriatik.
Dy skafistë shqiptarë janë arrestuar. Gjatë ndjekjes, trafikantët e kanë hedhur në det ngarkesën, duke e bërë edhe më të vështirë ndjekjen e tyre. Por pavarësisht këtij veprimi nuk kanë mundur që të shpëtojnë vetë, pasi u ndaluan në det të hapur nga Guardia di Finanza e Termolit dhe Barit të drejtuar nga avioni i Frontex.
Gomonia e fuqisë së lartë me tre motorë është sekuestruar, ndërsa vijon hetimi për të zbuluar rrjetin e trafikut të drogës. Trafikantët dhe gomonia i janë dorëzuar autoriteteve gjyqësore italiane.
Policia nuk bën të ditur emrat e trafikanëve për shkak të sekretit hetimor.
