Kryetari i PSD-së në Kosovë, Shpend Ahmeti ka reaguar në lidhje me sulmin që tronditi sot Prishtinën, ku një person mbeti i vdekur dhe tre të tjerë të plagosur rëndë.
Ahmeti shpreh ngushëllime për familjen e viktimës dhe shpreson në shërim sa më të shpejtë për të plagosurit.
Ai njofton se të gjitha informatat e sakta për autorët e ngjarjes do të bëhen të ditura pas hetimeve nga institucionet e rendit.
Postimi i plotë i Shpend Ahmetit:
Me shqetësim pranuam lajmin për ngjarjen e rëndë në Prishtinë ku si pasojë e një përleshjeje ka humbur jetën një qytetar dhe tre të tjerë janë të plagosur rëndë. Ekipet e Policisë dhe Mjekësisë Urgjente kanë reaguar menjëherë dhe prioritet është trajtimi i të plagosurve të cilët tashmë janë transferuar në QKUK.
Policia është duke mbledh informatat dhe tashmë ka edhe të arrestuar, por të gjitha informatat e sakta do të bëhen të ditura pas hetimeve nga institucionet e rendit. Në emër të Komunës shpreh ngushëllime për familjen e viktimës, e lutemi e shpresojmë se të lënduarit e tjerë të shërohen.
