Suksesi i “Ora e ligë” së gazetarit Enkel Demi nuk njeh kufi. Libri i tij nuk ka bërë bujë vetëm në vendin tonë, por edhe në shtetin fqinj. Demi ka dhënë një intervistë për programin “Fahrenheit”, Rai Radio 3.
Në këtë intervistë ai foli për librin e tij “Ora e ligë”, ku dha detaje në lidhje me përmbajtjen dhe përzgjedhjen e personazheve që autori ka përfshirë në të, raporton radio Club Fm.
Gjithashtu, nuk munguan detaje për subjektin e librit dhe frymëzimin e tij për ta bërë këtë libër.
Një roman i përshkuar nga një atmosfera magjike, personazhet e të cilit duhet të përballen me demonët e tyre.
Padyshim do ta përcaktonim si një epikë heroike që ndërthur tonet e errëta dhe nuancat delikate lirike, duke i kthyer lexuesit një afresk të shpirtit njerëzor në palosjet e tij më të pakuptueshme dhe të fshehura.
“Tom Kuka” është një pseudonim me të cilin Enkel Demi ka vendosur të përfaqësojë veten si autori i këtij romani.
Në një intervistë ai është shprehur se në fillim kur vendosi të shkruajë këtë libër, nuk ka dashur që lexuesit e tij ta dinë se kush është ai pasi kishte frikë nga paragjykimi dhe dyshonte në cilësinë e letërsisë së tij.
Por, në të vërtetë libri i tij rezultoi një sukses.
Madje mediat italiane janë shprehur se pena e këtij autori është e bukur, e cila në linearitetin e saj elegant i jep lexuesit një libër plot kuptim, ushqim të shkëlqyeshëm për të menduar dhe lexueshmëri të shkëlqyeshme. Rikujtojmë se ai ka publikuar dhe libra të tjerë si “Hide mbi kalldrëm”, “Gurët e Vetmisë” dhe “Flama”, novelë e cila së fundmi është vlerësuar me Çmimin Europian për Letërsinë.
Ndërkohë këtu mund të dëgjoni intervistën e plotë në versionin audio.
