Në çdo sallë kirurgjie në spitalin Rajonal të Shkodrës ka nisur përdorimi i instrumenteve të rinj kirurgjikalë, përmes programit modern të sterilizimit, i cili sapo ka nisur funksionimin në këtë spital, duke rritur sigurinë për pacientët.
Vlera e këtij investimi për spitalin Rajonal të Shkodrës është 1.2 milion Euro.
Programi i sterilizimit parashikon furnizimin e të gjithë spitaleve të vendit me instrumenta të rinj kirurgjikalë modernë; sterilizimin cilësor të instrumenteve kirurgjikalë; ofrimin e materialeve të buta ndihmëse njëpërdorimëshe për ekipin mjekësor dhe shtratin e operacionit; dezinfektimin e sallës së operacionit në fund të ditës; përpunimin e mbeturinave të rrezikshme dhe shndërrimin e tyre në mbetje urbane; ofrimin e set-it të personalizuar sipas çdo lloj ndërhyrje kirurgjikale.
“Me këtë investim, por edhe me investimet e 4 viteve të fundit me vlerë 400 milionë lekë në infrastrukturë, pajisje bio-mjekësore dhe ngritjen e shërbimeve të reja, spitali Rajonal i Shkodrës po kthehet në një qendër ekselence për veriun e Shqipërisë”, tha ministrja e Shëndetësisë dhe Mbrojtjes Sociale.
