Mbyllet Festivali 66 i Sanremos. Triumfi i takon grupit Stadio me këngën “Un giorno mi dirai”. Në vendin e dytë Francesca Michielin, një nga talentet e X Factor dhe në vendin e tretë çifti Iurato-Caccamo.
Fitorja e Stadio në fakt ishte e papritur dhe doli kundër të gjitha parashikimeve. Vetë Gaetano Curreri, vokali i grupit menjëherë pasi fitoi çmimin nuk e fshehu befasinë e këtij vlerësimi. Ai tha se Stadio kishte një raport dashurie dhe urrejtje me festivalin. “Kemi koleksionuar disa renditje si të fundit dhe nuk besonim kurrë që do ishim fitues”, tha Gaetano Currerinë skenën e teatrit Ariston.
Mbrëmja e djeshme ishte një triumf i spektaklit dhe i muzikës italiane me shumë mysafirë, ku dalluan balerini i jashtëzakonshëm Roberto Bolle, këngëtari Renato Zero dhe mysafiri i famshëm, këngëtari në modë, Willy William.
Gjatë këtyre mbrëmjeve të muzikës italiane u shënuan rekorde të mëdha të audiencës, falë punës shembullore të drejtorit artistik dhe prezantuesit Carlo Conti, i cili u shoqërua nga aktorja rumune, Madalina Diana Ghenea, aktori italian Gabriel Garko dhe komikja Virginia Raffaele. Garko u dallua thjesht si një djalë i bukur dhe mjeshtër i gafës.
Në natën finale të Sanremos mori pjesë edhe këngëtari shqiptar Ermal Meta, i cili nuk la gjurmë të veçantë, përveç faktit që vizatoi në fytyrë ylberin në mbështetje të homoseksualëve.
Stadio janë të ftuar të marrin pjesë në natën finale të Eurovision në 14 maj në Stokholm. Nuk dihet nëse ata do ta përfillin këtë eveniment ku Shqipërinë e përfaqëson Eneida Tarifa me këngën “Përrallë”.
