Ish ministri, rekurs për ndryshim të masës së sigurisë
Spiro Ksera, ish ministër i punës në qeverinë Berisha, kërkon nga Gjykata e Lartë të ndryshohet masa e arrestit ndaj tij. Sipas Kserës arrestimi i tij është i paligjshëm dhe masa e arrestit në burg, është ekstreme, për shkak se nuk ekziston asnjë rrezik të largohet nga Shqipëria, të prishë provat e dosjes, apo të ndikojë në fatin e hetimit. Për këtë qëllim avokati i ish ministrit, Genci Gjokutaj, ka dorëzuar rekursin duke kërkuar ndryshimin e masës së sigurisë dhe lirimin e tij nga qelia ku ndodhet prej afro një muaji.
Pas marrjes së rekursit pritet që Gjykata e Lartë të hedhë shortin dhe të përcaktojë trupën që do të shqyrtojë dosjen. Spiro Ksera, dyshohet për akuzën e vjedhjes nëpërmjet shpërdorimit të detyrës, në shumën e 30 milionë lekëve.
