Misioni do bëjë një skanim të gjendjes së ekonomisë
Sot në Tiranë mbërrin misioni i radhës i Fondit Monetar Ndërkombëtar, I cili do të jetë I instaluar në kryeqytet për dy javë me radhë. Në axhendën e bisedimeve të misionit me autoritetet e vendit janë zhvillimet aktuale të ekonomisë, ndërhyrjet që duhen bërë për paketën fiskale 2017, si edhe monitorimi i realizimit të objektivave të vendosura në marrëveshjen e bashkëpunimit Qeveri-FMN.Duket se kësaj radhe bisedimet nuk do të jenë të lehta, pavarësisht se pak ditë më parë bordi i FMN i miratoi dy këste të kredisë për Shqipërinë. Misioni pritet që ti kërkojë qeverisë heqjen e çdo përjashtimi nga taksat, të bërë deri tani për sektorë të caktuar, siç është rasti i heqjes së taksave për biznesin e vogël apo edhe tarifat zero për shumë produkte. Seria e takimeve në drejtoritë e tatimeve doganave, kompanitë e energjisë, ministrinë e ekonomisë dhe atë të financave, komisionin parlamentar të ekonomisë, mbyllet me bisedimet që përfaqësuesit e misionit do të kenë me Ministrin e ri të Financave, Arben Ahmetaj dhe Guvernatorin e Bankës së Shqipërisë, Gent Sejko.
Programi i bashkëpunimit Qeveri – FMN ka si komponent edhe mbështetjen financiare prej 331 milion euro, nga e cila deri më tani janë dhënë 6 nga 9 këstet e përcaktuara para 2 vitesh.
