Maturantët do t’i nënshtrohen sot testimit në lëndën e Matematikës. Ky është testimi i tretë për ta, pas Gjuhës së Huaj dhe Gjuhës Shqipe e Letërsisë që janë dhënë më parë.
Sipas Ministrisë së Arsimit, në të gjithë vendin janë ngritur 167 qendra testimi me 7 mijë mësues administrues, teksa 33 mijë maturantë do të marrin pjesë në testim.
Përpara se të futen në provim nxënësit duhet të paraqiten në qendrën e testimit, 1 orë e 30 minuta para dhe me mjet identifikues me vete si dhe mjetet shkollore të nevojshme.
Në disa shkolla janë vendosur bllokues valësh në mënyrë që të shmanget kopja me telefon si dhe ka detektorë në hyrje për të zbuluar çdo aparat që mund të tentojnë të fusnin nxënësit.
Ndërkohe provimi i lëndës me zgjedhje të jepet në datë 24 qershor.
