Këtë të të martë (8 shtator) do të bëhet përzgjedhja e anëtarëve të Kolegjit Zgjedhor ku do të vendosen 8 gjyqtarë. Prej disa muaj kolegji aktual ishte jashtë funksionit për shkak të dorëheqjeve të anëtarëve dhe shkarkimit nga procesi i vettingut të disa prej tyre.
Pas caktimit të datës së zgjedhjeve parlamentare më 25 prill 2021 nga presidenti i Republikës Ilir Meta, Këshilli i Lartë Gjyqësor sot në 17:00 përcakton me short 8 gjyqtarët e Kolegjit Zgjedhor, që do të shqyrtojnë ankesat e partive politike vitin e ardhshëm. Mes emrave është edhe Ardian Dvorani, ish-kryetar i KED-së. Shorti do të organizohet tek ”Poli i Drejtësisë”.
Kandidatët për Kolegjin Zgjedhor: Manjola Xhaxho; Gentian Medja; Sokol Ibi; Klodiana Mema (Veizi); Enton Dhimitri; Alma Kolgjoka; Emona Muçi; Eriol Roshi; Ornela Naqellari; Esmeralda Çeka (Xhili); Rexhep Bektheshi; Margarita Buhali; Ardian Dvorani; Asim Vokshi; Artur Kalaja; Edlira Petri.
