Pikërisht sot është ndoshta 90 minutëshi, kur të gjithë futbollistët e angazhuar, ata të Superiores, apo të Kategorisë së Parë, kanë në këmbët e tyre mundësinë e suksesit, apo ta shkelmojnë tutje të gjithë këtë sezon të filluar qysh në verë. Kuksianët vazhdojnë ta kërkojnë Europën nëpërmjet kampionatit, ndërsa Kupën e Shqipërisë e konsiderojnë si një trofe që u takon pas këtyre tre sezonesh për t’u memorizuar. Por vizitore në “Zeqir Imeri” do të jetë Vllaznia e Cungut, e trajnerit që startoi udhëtimin e jashtëzakonshëm të Kukësit që në ditën e debutimit dhe që tani skuadrën e vendlindjes nuk e ka në pozicion komod në tabelën e klasifikimit. Flamurtari udhëton në Pukë ku nuk kanë më objektiva, por aq e domosdoshme është nevoja për pikë e vlonjatëve, saqë administratori Idrizi ka telefonuar kryetarin e Bashkisë së qytetit verior, për t’i kërkuar pikërisht atij që të luhet futboll i ndershëm. Bylis – Teuta nuk ka fjalë për të thënë. Mallakastriotët janë në një garë që ndoshta i kalon edhe mundësitë e tyre, por sido që të ndodhë, qëndresa e kësaj skuadre është e garantuar, pasi kështu ka ndodhur gjithmonë. Skënderbeu – Laçi kuotohet si një ndeshje pa histori, pra thjeshtë në vazhdën e seancave përgatitore dhe në fund derbi, i cili ka devijuar edhe përsa i përket orarit. Ky është vërtetë shansi i fundit i Tiranës dhe në rast të një rezultati negativ, sportivisht nuk do të ketë më asnjë mundësi të rikuperojë, ndërkohë që do të humbasin përfundimisht lidhjet me tifozët e tyre të ndjeshëm, derisa skuadra të riformatohet me emra të tjerë që nuk janë mëktarë. Por edhe për Partizanin, “Selman Stërmasi” është stacioni i mbetur për trenin Champions… Tani skena është gati, pritet vetëm ngritja e siparit.
Sot java 33-të
Kukësi – Vllaznia (15:30)
Skënderbeu – Laçi (15:30)
Tërbuni – Flamurtari (15:30)
Bylis – Teuta (15:30)
Tirana – Partizani (18:30)
