Pritet të shqyrtohet edhe kërkesa për zgjedhjen e kryetarit
Mbledhja e Asamblenë Kombëtare të PS e cila mblidhet sot, do të vendosë për mënyrën e zgjedhjes së kryetarit, zgjedhjet e reja në parti, rinovimin e strukturave si dhe anëtarësimet e reja ne parti. Prej javësh në PS ka një debat sidomos për zgjedhjen e kryetarit. Partia është e ndarë më dysh, nga njëra anë mbështetësit e kryetarit Rama që thonë se me fitoren e zgjedhjeve konfirmohet edhe kryetari i partisë dhe nga ana tjetër deputeti Ben Blushi dhe mbështetësit e tjerë socialistë që mbështesin idenë e votimit të kryetarit, pavarësisht fitores në zgjedhje. Pikërisht kërkesën e 11 firmëtarëve për zhvillimin e zgjedhjeve për kryetarin pritet të diskutojë sot Asambleja Kombëtare e Socialistëve.
Një ditë më parë Komisioni i Garancive Statutore pranoi vetëm pjesërisht kërkesën e deputetëve Ben Blushi, Arta Dade dhe Mimoza Hafizi për intepretim të statutit ekzistues të PS-së. KGS thekson se do jetë Kongresi që do të përcaktojë nësë duhet të ketë apo jo proçes zgjedhje. Kongresi i socialistëve do të mbahet më 19 mars.
