Një fëmijë vetëm 1-vjeç e gjysmë ka rënë në vatrën e zjarrit ku po zihej raki në oborrin e shtëpisë. Ngjarja ka ndodhur mbrëmjen e sotme në fshatin Therepel të rrethit të Skraparit.
Mësohet se fëmija ka qenë duke luajtur në oborrin e shtëpisë, kur ka shkarë dhe është rrëzuar në gropën ku babai i tij po ziente rakinë. Si pasojë, fëmija i mitur ka pësuar djegie të rënda dhe fraktura të shumta në të gjithë trupin.
Largësia e madhe e fshatit me Skraparin ka bërë që fëmija të mbërrijë në duart e mjekëve në gjendje kome. Mjekët e Spitalit të Skraparit e kanë transportuar të miturin me ambulancë drejt Spitalit të Traumës në Tiranë, duke deklaruar se gjendja e fëmijës ishte mjaft kritike.
