Partia Demokratike ka reaguar në lidhje me skandalin e Doganave ku drejtori Gent Gazheli zhdoganonte makinat luksoze si makina të dëmtuara. Në një deklaratë për mediat Sekretarja për Transparencën, Luftën kundër Korrupsionit dhe kthimit të Pronave në PD, Ledina Mandia e ka konsideruar Gazhelin si mbret i hajdutërisë. Ajo e quan si Hamza të shtetit dhe sulltanatit të Edi Ramës, i cili si Enver Hoxha ka në dorë të gjithë hallkat e pushtetit.
“Promovimi direkt i Edi Ramës, kryedoganieri Gent Gazheli, po bën namin dhe po lë nam. Nga ngritja në detyrë e të proceduarve për kontrabandë nga drejtësia greke, te emërimet nepotike në sektorë kyç, dhe deri te vjedhja e hapur me manipulim të vlerës së makinave luksoze, ai po thyen çdo rekord të zi. Me bëmat si kryedoganier, ai po kalon edhe Elisën e çudirave duke i bërë doganat një botë të zhvatjes për xhepat personalë dhe arkën e partisë-shtet.
Partia Demokratike dëshiron të theksojë se: Mbreti Gent i hajdutërisë së doganave nuk është asgjë më shumës e gazheli i radhës i Edi Ramës. Ai është maska e një fytyre qeveritare, që nuk bën dot më shumë se makijazh për vjedhjet dhe vjedhje për makijazhin. Ai është një Hamza i shtetit në sulltanatin e një njeriu që, ashtu si Enver Hoxha, ka në dorë të gjithë hallkat e pushtetit. Ai është masha për të mos djegur duart kryekleptokrati, në një zjarr që ngroh oligarkët dhe djeg Shqipërinë”, thuhet në deklaratë.
Ndër të tjera PD, është shprehur se Gazheli është kurbani i radhës në librin plot me hakmarrje të shefit të madh, i cili pasi i zgjedh për profilin si hajdutë, i lëshon duke thënë se nuk i kishte njohur.
