“Kjo është një çështje që ka të bëjë me transparencën”
Zbulimi i skandalit të “Panama Papers” është pozitive. Ky është qëndrimi I kreut të Kuvendit Ilir Meta, i cili në një intervistë në RTK, tha se rasti i kompanisë shqiptare që ka fshehur të ardhura, duhet ti bëjë autoritetet të vëmendshme për praktikat koncesionare dhe Prokurorinë të motivuar për të hetuar. Kryeparlamentari Meta u shpreh kështu: “Për mua patjetër çdo rast duhet të hetohet, dhe ne e kemi kërkuar këtë gjë. Dhe çdo rast tjetër që do të dalë jo vetëm nga “Panama Papers”, por edhe nga çdo lloj parajse fiskale, ku ka të përfshirë politikanë shqiptarë. Nuk po themi botërorë se nuk po përgjigjemi për të gjithë botën. Sepse kjo është një çështje që ka të bëjë me transparencën, por ka të bëjë edhe me integritetin, ka të bëjë në fund fare edhe me taksat e qytetarëve shqiptare. Ajo që unë mendoj për ne, nga rasti në fjalë, është që ne duhet të forcojmë transparencën për sa i takon praktikës së dhënies së koncesioneve në të ardhmen dhe të përmirësojmë legjislacionin në këtë drejtim, sepse ato mund të kthehen në një barrë shumë të madhe për buxhetin e shtetit dhe në një pengesë për zhvillimin e vendit, dhe njëkohësisht, për fat të keq, në një kosto të rritur për qytetarët tanë dhe në një cilësi të parealizuar të shërbimeve ndaj tyre. Siç edhe ka ndodhur me shumë koncesione deri tani”.
