Deputetët e opozitës kanë denoncuar skandalin e fortë në seancën e sotme në parlament në përfundim të së cilës pritet që të votohen ndryshimet kushtetuese.
Që në hapje të seancës plenare, ishte deputeti Adriatik Alimadhi, i cili deklaroi se dokumentet parlamentare janë falsifikuar dhe nuk përmbajnë firmat reale.
“Do kërkoja që një nga listat ku kanë firmosur deputetët, të na vihej në dispozicion. Shqetësimi është shkelje ligjore. S’mund të mendoj se një deputet ka firmosur për disa apo në emër të disa deputetëve të tjerë. Kjo më duket shkelje proceduriale. E shoh të pamundur mënyrën se si operohet kur kushtetuta ka një gjithë-përfshirje në gjuhën e saj juridike dhe në rastin konkret kërkohet që 28 deputetët të opozitës parlamentare, kanë firmosur, por unë mendoj se këta deputetë, s’kanë ndërgjegjësim të saktë se për çfarë flitet më sakt për ndryshimet kushtuese. I bëj apel zotit Murrizi, se në 25 maj të vitit të kaluar kemi firmosur një dokument për ndryshimet zgjedhore, për një sistem të pastër kombëtar. Do doja që ta shihnit me realizëm, pasi kjo nisëm kushtetuese privon liritë dhe të drejtat”, tha Alimadhi.
Ndërsa deputeti Kujtim Gjuzi akuzoi se në fletë janë katër firma të falsifikuara.
“Keni 4 firma të falsifikuara në listën e deputetëve, Kujtim Gjuzi e deklaron votën kundër kësaj, dhe në këtë moment unë e braktis sallën e Kuvendit. Nga tani e tutje do të nisë përgjegjësia penale dhe për ju”, deklaroi Gjuzi dhe u largua në mënyrë demostrative nga salla.
