Bashkia e Durrësit ka reaguar pas protestës së banorëve të pallatit i cili u shkatërrua nga tërmeti. Në një deklaratë, bashkia thekson se pallati nuk do të ndërtohet në tokën ku ka qenë pasi në këtë tokë do të ndërtohet një memorial në kujtim të viktimave që kanë humbur jetën nga tërmeti. Banorët e pallatit të shkatërruar, të cilët aktualisht jetojnë në banesa me qera, do tu ndërtohet pallati në një lagje tjetër.
Edhe pse banorët u shprehën për ‘Fax News’ se ata posedojnë të gjitha dokumentet që vërtetojnë se ata janë pronarë të kësaj toke, bashkia ka vendosur që t’i largojë ata nga zona në qendër të Durrësit, në një zonë pranë portit.
Banorët të shqetësuar u shprehën se qëllimi real i bashkisë është që pas disa vitesh nga ndërtimi i memorialit, prona t’i jepet ndonjë firme për ndërtim pallati.
Reagimi i bashkisë:
Në lidhje me shqetësimin e banorëve të pallatit në lagjen 6 (pallati barons) Bashkia e Durrësit deklaron se:
1. Bashkia e Durrësit ka detyrimin që të strehojë në shtëpi të reja brenda Durrësit të gjithë ata banorë që kanë humbur shtëpitë e tyre nga tërmeti. Edhe banorët e pallatit në fjalë do të strehohen në shtëpi të reja dhe më të sigurta nga ato që kanë patur përpara tërmetit. Sipas planit të detyruar vendor për zonën e dëmtuar pikësore për 4 banesa kolektive, Bashkia Durrës, i miratuar me vendim nr.591 datë 18.08.2021, është parashikuar që të ndërtohen disa banesa shtesë në pallatin nr.14 në lagjen 17(pallati i Kastratit). Pra banorët e pallatit në lagjen 6 do të strehohen në pallatin nr.14(pallati i Kastratit) që do të rindërtohet.
2. Ata do të marrin shtëpi të reja në pallatin e ashtuquajtur pallati i Kastratit që do të rindërtohet.
3. Banorët e këtij pallati kanë përfituar bonusin e qerasë dhe do të vazhdojnë ta përfitojnë atë derisa të strehohen në shtëpitë e tyre të reja.
4. Në vendin ku më parë ka qenë ky pallat do të ketë një shesh të sistemuar dhe një memorial në kujtim të jetëve të humbura nga fatkeqësia natyrore të këtij pallati.
Bashkia e Durrësit me mbështetjen e qeverisë shqiptare vijon punën për procesin e rindërtimit që po ecën me ritme të shpejta. Po kështu kjo Bashki do të vijojë të dëgjojë me kujdes të gjitha shqetësimet e banorëve të Durrësit dhe do të vijojë të jetë në shërbim të qytetarëve në çdo çast.
Ndërkohë bashkia e Durrësit bie në kontradiktë me deklaratat e saj. Në një vendim të publikuar te Komisionit Shtetëror te Rindërtimit, më 15 Maj 2020, bashkia Durrës thotë se pallati i shembur nga tërmeti i 26 Nëntorit do të ndërtohet po në të njëjtin truall.
Ditën e sotme në një sqarim për banorët të cilët protestuan, bashkia e Durrësit deklaroi se pallati do të ndërtohet në një truall tjetër, pasi në truallin ku ndodhej më parë do të ndërtohet një memorial për viktimat e tërmetit.
