Kompania e telefonisë celulare One Telecommunications është shndërruar në një grabitëse e qytetarëve shqiptarë përmes faturave. Një qytetare denoncon në Boldnews.al skandalin me këtë kompani, e cila e ka tarifuar klienten e saj prej 12 vitesh në këtë kompani me një shifër prej 3774 për një muaj, për shërbime të pa kryera në këtë vlerë.
Abuzimi i kompanisë me faturën e denoncueses duket se është lidhur me aktivizimin e paketës roaming për një periudhë 1-javore internet (2-9 korrik 2022), e cila kushton 800 lekë, por që qytetarja thotë se ky shërbim asaj nuk iu ofrua, fakt që kompania mund ta vërtetojë në të dhënat e saj në sistem. Kjo është vjedhja e parë.
Më tej, qytetarja sqaron se fatura e përmuajshme e numrit të saj me kontratë është në vlerën e rreth 1400 lekë, ndërkohë që gjatë muajit që u aktivizua paketa roaming javore internet, vlera e pajtimit mujor në faturë me TVSH është shënuar 1900 lekë. Qytetarja nuk është informuar dhe as ka dakordësuar me kompaninë për ndryshim të planit tarifor. Pra, 500 lekë është vjedhja e dytë.
Vjedhja nga kompania One vijon edhe më tej. Gjatë kohës së qëndrimit jashtë vendit (2-15 korrik), qytetarja ka pasur rreth 4 minuta thirrje hyrëse në total, si dhe 3 thirrje dalëse me një total 1 minutë e 18 sekonda (thirrjet me ngjyrë të kuqe në faturë).
Kompania One në mesazhet e saj drejtuar abonetëve dhe faqen zyrtare thotë se 1 minutë telefonatë roaming hyrëse kushton 100 lekë, ndërsa 1 minutë dalëse kushton 120 lekë (zona 1). Bazuar në këtë tarifim, vlera e telefonatave hyrëse që ka kryer qytetarja gjatë kohës së qëndrimit jashtë vendit është rreth 400 lekë, ndërsa vlera e telefonatave dalëse (1 minutë e 18 sekonda) edhe nëse 18 sekonda i tarifojmë po me 120 lekë minuti, është 240 lekë. Në faturën e kompanisë One, vlera e telefonatave hyrëse është shënuar 312,5000 lekë, ndërsa vlera e thirrjeve dalëse është 999,9996 lekë. Pra, për një maksimum tarifimi prej 640 lekë, qytetarja është faturuar nga One 1312 lekë, ose thënë ndryshe dyfish. Përfshirë edhe TVSH 20% vlera e trafikut mujor në faturë është 1574 lekë.
Brenda një muaji kjo qytetare është vjedhur 3 herë në mënyra të ndryshme nga kompania e telefonisë celulare One. Ky nuk është rasti i parë dhe as i fundit, por është një skandal që duhet denoncuar në çdo rast dhe në çdo kohë, në të kundërt njësoj do të vazhdojnë të na vjedhin./Boldnews.al/
