Xhuljana Sejdini është pronare e agjensisë doganore “Ujori shpk”, kishte përfaqësues në pikën e kalimit kufitar të Qafë, Thanës Maliq Kadillin, tashmë i arrestuar nga Prokuroria për Krime të Rënda
Bashkëshortja e kryebashkiakut socialist, Qazim Sejdini, dyshohet se është përfshirë në trafikun e 8 ton drogë të transportuar me kamion përmes doganave të Qafë Thanës e Durrësit. Kompania “Ujori shpk” është në pronësi të Xhuljana Sejdinit, dhe po hetohet si e përfshirë në trafikun e drogës me kamion. Pronësia e bashkëshortjes së kryebashkiakut socialist mbi kompaninë “Ujori SHPK” është faktuar pranë QKR-së. Kamioni me 8 ton drogë kaloi dy dogana atë të Qafë Thanës dhe të Durrësit më pas u kap në Itali. Për këtë trafik të madh ndërkombëtar janë arrestuar doganierë e policë si dhe një punonjës i agjencisë së Sejdinit.
ABC News nga burimet e prokurorisë ka mësuar se agjencia doganore ka si administratore Rezarta Shehun, por sipas regjistrimit në qendrën kombëtare të biznesit ajo rezulton si pronë e bashkëshortes së kryetarit të bashkisë së Elbasanit, Xhuljana Sejdini.
Ditën kur kaloi kamioni me drogë, kompania “Ujori Shpk”, kishte përfaqësues në pikën e kalimit kufitar të Qafë Thanës Maliq Kadillin, tashmë i arrestuar nga Prokuroria për Krime të Rënda. I dyshuari Kadilli në emër të agjensisë doganore “Ujori shpk”, ka përpiluar dokumentet për hyrjen dhe tranzitimin e kamionit që drejtohej nga i arrestuari në Itali, Zoran Stanojoski.
Agjencia doganore “Ujori”, fillimisht në doganën shqiptare ka deklaruar se kamioni me drejtues Stanojoskin, kishte si destinacion dalje nga Shqipëria pikën e kalimit kufitar të Hanit të Hotit. Por rreth mesditës së datës 5 shkurt 2017, i arrestuari Kadilli i është drejtuar doganës shqiptare, me një kërkesë, duke kërkuar ndryshimin e destinacionit të kamionit.
Sipas kërkesës, dalja e kamionit që drejtohej nga Stanojoski nuk do jetë Hani i Hotit por pika e kalimit kufitar të portit të Durrësit, pasi deklarata e parë është bërë gabimisht.
Kamioni, mësohet se në portin e Durrësit nuk i është nënshtruar kontrollit të imtësishëm pavarësisht ndryshimit të destinacionit duke hipur kështu në tragetin e linjës Durrës-Ankona. Por me të mbërritur në portin e Ankonës, autoritet italiane kanë konstatuar se brenda rimorkios së kamionit ishin fshehur 8 ton hashash, të cilat u bllokuan me cilësinë e provës materiale.
Nga ana tjetër burimet pranë Prokurorisë për Krime të Rënda i thanë ABC News, se nuk përjashtohet nga hetimi edhe agjencia doganore “Ujori shpk” si bashkëpunëtor në rrjetin e trafikut të drogës. Pasi përfaqësuesi i tyre në pikën e kalimit kufitar të Qafë Thanës, tashmë është arrestuar dhe dyshohet se është pjesë e rrjetit të trafikut të drogës në kuadër të grupit të strukruar kriminal. Për llogari të këtij hetimi, mësohet se prokuroria ka sekuestruar të dhënat e kompanisë në Qendrën Kombëtare të Bizneseve dhe po verifikohen të gjitha praktikat dhe procedurat e ndjekur nga kjo kompani në pikën e kalimit kufitar të Qafë Thanës dhe portit të Durrësit.
