Në muajin mars nuk do të ketë më abone dhe qytetarët shqiptarë do duhet të paguajnë biletë sa herë përdorin transportin urban. Lajmin e ka bërë të ditur vetë Unioni i Transportit Publik, i cili përmes një njoftimi publik ka bërë me dije se për shkak të çmimit të naftës që vazhdon të rritet ata kanë kaluar në kolaps financiar, për këtë arsye heqin abonetë dhe mund të rritet çmimi i biletës.
Ata e justifikojnë këtë veprim ekstrem pasi nuk janë përmbushur kërkesat e tyre nga qeveria për heqje të akcizës dhe TVSH-së si edhe subvencionimin e aboneve për personat me aftësi të kufizuara.
“Në vijim të shkresave dërguar të gjitha institucioneve vendimmarrëse në lidhje me problematikat e transportit publik qytetas në nivel kombëtarë, që kanë të bëjnë me pamundësinë financiare të operimit normalisht, informojmë qytetarët se në mungesë të një ndihme reale nga Qeveria, janë të pamundur për të ofruar të gjitha shërbimet e këtij aktiviteti.
Sa më sipër, për muajin Mars, nuk mund të ofrohet si shërbim me bileta të pajtimit mujor (ABONE), pasi aktiviteti që ne përfaqësojmë ndodhet në kolaps ekonomik. Mbetemi ende me shpresën e një zgjidhje të kësaj situate sipas premtimeve të bëra”, thuhet në njoftim.
Kujtojmë se pak ditë më parë ata paralajmëruan se do të pezullojnë shërbimin urban, por vazhduan pas një deklarate të Ministrisë së Financave, e cila tha se do të gjejë një zgjidhje. Kjo deklaratë e fundit tregon se qeveria nuk po jep asnjë zgjidhje.
