Transferohen 1500 refugjatë nga ishulli Lesbos në zonat veriore të Greqisë. 635 refugjatë të shoqëruar nga policia greke, rojet bregdetare si dhe Forcat Speciale të ushtrisë greke, kanë arritur në Selanik ndërsa deri në fund të ditës pritet dhe grupi i dytë.
Vetëm duke u gdhirë dita e sotme në ishullin Lesbos kanë arritur 125 refugjatë të tjerë nga Turqia, ndërsa nga dita e enjte, 29 gusht janë dorëzuar rreth 1000 kërkesa të reja, nga të sapoarritur. Java e fundit e gushtit në Lesbos ka shënuar një numër rekord arritjesh të varkave me refugjatë nga brigjet turke.
Në kampin Moria të këtij ishulli ndodhen 10.241 refugjatë, një numër rekord i viteve të krizës humanitare. Situata do të vështirësohet shumë me arritjen e 1000 të tjerëve, pavarësisht tendave ekstra të vendosura nga organizatat bamirëse këto ditë.
