Kryetari i Degës së Durrësit, Luan Hoti, ka bërë me dije gjatë mbledhjes së Kolegjit të Kryetarëve se demokratët nuk duhet të përçahen, por të bashkohen. Ai u shpreh se ndryshe, nuk kanë asnjë shans për të dalë fitues.
“Problemi është se demokratët janë përçarë dhe sa herë të hyjmë në zgjedhje nuk do arrijmë dot rezultat. Duhet të gjejmë zgjidhje se baza është e përçarë. Kështu nuk kanë se çfarë të bëjnë. Zgjidhjet nuk vijnë tani se jemi të irrituar. Nuk ka zgjidhje me ik ti e hajde ti. Të reflektojmë, të qetësohemi.
Nuk i lamë gjë mangët fushatës, problemi është përçarja e demokratëve. Garën nuk e kisha me demokratët, e kisha me Sakon, po nuk ishte kështu për pjesën tjetër. Demokratët na ndëshkuan të dyja palëve.”
Gjithashtu, Hoti tha se tërheqja e Bashës nuk është zgjidhje e këtij momenti, por sipas tij, duhet një formulë bashkimi.
Cila është zgjidhja? A është zgjidhja largimi i kryetarit? Basha thotë se është gati për çdo zgjidhje, por tërheqja e tij nuk është zgjidhja në këtë moment. Duhet bashkimi, po shkuam në 2-3 kampe, nuk fitojmë. Duhet bashkim. Për zgjedhje brenda partisë nuk mund të mendojmë, të paktën jo brenda një viti. Duhet një formulë bashkimi fillimisht”, përfundoi Hoti.
