Kreu i Këshillit të Lartë të Prokurorisë, Alfred Balla ka raportuar këtë të mërkurë në Komisionin Parlamentar të Ligjeve për mbarëvajtjen e institucionit që drejton.
Balla tha se në vitin 2021 ka pasur prokurorë të shkarkuar dhe disa të tjerë të arrestuar. Ai pranoi se sistemi ndodhet në krizë, duke shtuar se në disa sektorë, prokurorët janë më të pakët në numër.
“KLP është mbledhur në 39 seanca plenare. 5 herë në muaj, me një intensitet që e çmoj. Ligji thotë që të mblidhemi të paktën një herë në muaj. Gjatë vitit 2021 nga ana e KLP kemi përgatitur 52 raporte vlerësimi profesional për prokurorët në kuadër të procesit të vettingut. KLP gjatë vitit 2021 ka kryer verifikimin e pasurisë edhe për kandidatët për inspektor pranë inspektorit të lartë të drejtësisë. Kemi komanduar tre prokurorë. Sot struktura aktuale e Prokurorisë së Posaçme është 20, ndërsa ushtrojnë detyrën 17 prokurorë. Kemi menduar të mos prishim strukturën. Duhet thënë që sistemi i prokurorisë nuk është në ditën më të mirë. Gjatë vitit 2021 janë shkarkuar 41 prokurorë të tjerë. Në sistem sot që flasim janë 204 prokurorë në fakt, por organika është 341 prokurorë. Rezultatet flasin vetë. Kemi gati 21 dorëheqje të prokurorëve gjithashtu kemi dhe 20 prokurorë të komanduar. Prokurorë nga sistemi mund të shërbejnë edhe në zyra të tjera”, tha Balla.
