Sindikata e taksistëve ka dalë sot në protestë në lidhje me rritjen e çmimeve të karburanteve përpara kryeministrisë. Ata kërkojnë uljen e çmimit të naftës, të lejohen që kur dalin jashtë qytetit të marrin pasagjerë në kthim dhe së treti të mos jepen licenca jashtë kritereve.
Kreu i sindikatës, Bilbil Cara ka renditur të gjithë kërkesat e tyre:
“Sindikata e Bashkive po organizon një protestë qytetare. Të zbatojmë rregullat e ligjet që të tregojmë qytetari. Qëllimi jonë të arrihet. Sindikata organizon protestën me qëllim kryesor 3 pika, pika e parë është rritja e karburanteve. Kjo është shumë e vështirë për arsye të punës dhe shërbimit tonë. I kemi kërkuar dhe i kërkojmë institucioneve dhe zotit kryeministër. Sot i kërkojmë kryeministrit të na mbështesë, të ulë akcizën dhe TVSH për shërbimet taksi. Kostoja nuk del. Populli do të paguajë trefish më shumë. Ne që nga viti 2009 nuk kemi ngritur çmimet.
Pika e dytë është anulimi i udhëzimit të vitit 2009 ku aty thuhet se liberalizimi i taksive 4 + 1. Kjo ka degraduar biznesin tonë, sepse çdo qytetar mund të blejë makinë dhe të punojë taksi. Ka ra puna për të gjithë. Është e vështirë që një taksist të punojë dhe të mbajë familje. Ne nuk jemi autobusi jemi 4+1, pse ne duhet të kthehemi bosh, kur unë kam pronotim rezervim. Kemi hasur vështirësi edhe me familjet tona, nuk i kthejmë dot ata. Këto janë kërkesat”.
Ndërsa një tjetër taksist, tregoi se me rritjen e çmimit të karburanteve, është trefishuar tarifa për qytetarët.
“Kemi ndalur për rritjen e çmimeve. Kemi dalë të protestojmë. Të ulet pak nafta, nuk ia dalim dot me këtë tarifë. Në një ditë pune makina ime harxhon 10 litra, i bie 27 mijë lekë. Për 1 km e gjysmë ne marrim 3 mijë lekë. Çmimi është dyfishuar. Ka shumë padrejtësi. Ka taksi pa letra. Ka taksi që nuk paguajnë taksat. Bashkitë dhe pushteti bëjnë sikur nuk dinë gjë, por në fakt i dinë të gjitha. Bashkia e Tiranës nuk na lejon pasagjeret në kthim. Janë shumë probleme që nuk na i zgjidh njeri”.
