Në katër vjet u ngjirën për shqiptarinë me fjalime patetike dhe me thirrje “O sa mirë me qenë shqiptar!” në stadiume futbolli.
Organizuan fushata kuq e zi dhe mbajtën këngë e ode patriotike, por kur erdhën zgjedhjet bënë të pamundurën që të fusnin në Kuvend sa më shumë grekofonë dhe pakica të tjera kombëtare. E kanë mbushur Kuvendin ding.
Por, nuk u ndalën me kaq. Janë duke bërë namin e zi që kryetari i shqiptarëve të Çamërisë, Shpëtim Idrizi mos të hyjë në Kuvend.
Mandati i tij është i qartë si drita e diellit, megjithë manipulimet që kanë bërë në masë në Qarkun e Tiranës dhe me fletët e pavlefshme që kanë nxjerrë me shumicë.
Ka 5 ditë që askush nuk nxjerr rezultatin përfundimtar e të hedhin në sistem 3 kutitë e fundit. të Qarkut të Tiranës. Me 12.327 vota (nga rezultatet e hedhura deri tani), ky mbetet mandati më “i shtrenjtë” në Tiranë, duke llogaritur se mandatet e tjera janë marrë edhe me 10.000 vota dhe i 18 që synon Partia Socialiste i bie të djegë mandatin e Shpëtim Idrizit dhe të merret me 6000 deri në 7000 vota.
Por, nuk duan që Idrizi të jetë deputet. Po ushtrojnë presion të madh në KQZ që ai mos të regjistrohet si i tillë.
Partia që udhëheq Shpëtim Idrizi pati rritje në vota po aq sa Partia Socialiste që fitoi zgjedhjet, plot 40 mijë vota, por nuk prodhon dot më shumë se katër deputetë. Ka mbledhur në gjithë vendin 85 mijë vota dhe duhet të kishte të paktën 8 deri në 10 të tillë. Nuk duan të ketë patriotë në Kuvend, kjo është arsyeja. Kanë për borxh ta shajnë grekun e serbin katër vjet rresht, por pastaj si manarë i binden dhe e vënë në krye të sofrës nga e majta në të djathtë.
Të gjithë deputetët grekë të mbledhur bashkë nuk bëjnë dot 1/3 e votave të fituara nga PDIU, por ata janë atje në ballë të vendit, gjë që i ka gëzuar pa masë mediat greke dhe zotin Tsipras që nxitoi të uronte bashkëpunëtorin e tij të ngushtë në Ballkan, Edi Rama.
Gjithë jetën mbetëm legena përballë fqinjëve dhe vëllavrasës në atdhe.
