Pas 9 orësh në dyert e hetuesisë së SPAK, merr fundja marrja në pyetje e ish-ministrit Ilir Beqja. Mësohet se Beqja është pyetur për koncensionin e sterilizimit.
“Dhashë shpjegimet e mia para prokurorisë”- u shpreh ai.
Ilir Beqaj u ndal para mediave. Ai tha se nuk i trembej nje hetimi penal.Beqaj dha llogari para oficerëve të SPAK në cilësinë e deklaruesit në lidhje me koncesionin e sterilizimit, i cili po hetohet si një koncesion korruptiv në shkelje të barazisë në tendera dhe shpërdorim detyre.
Ish-ministri i Shëndetësisë Ilir Beqaj është paraqitur mëngjesin e sotëm në Prokurorinë e Posaçme Anti-Korrupsion (SPAK) pasi dyshohet se është përfshirë në skandalet me koncesionet në shëndetësi.
Gjatë kohës që ai drejtoi Ministrinë e Shëndetësisë, firmosi privatizimin e sterilizimit, hemodializës dhe kontrollit të detyrueshëm shëndetësor (check-up). Beqaj është i fundit në radhën e personave që janë thirrur në SPAK për të dëshmuar për koncesionin e sterilizimit.
Pak ditë më parë në lidhje me këtë çështje në SPAK dëshmoi ish-vartësi i tij, Klodian Rrjepaj i cili ka mbajtur postin e zv-ministrit të Shëndetësisë në kohën kur ky dikaster drejtohej nga Beqaj.
Dosja është në prag të finalizimit dhe SPAK pritet të presë fletëarrestet për personat që kanë abuzuar me tenderat. Procedura për sterilizimin e seteve kirurgjikale është dosja e parë e SPAK edhe është nën hetim prej 3 vitesh.
Kallëzimi u bë nga përfaqësues të Nismës Thurje, të cilët kanë denoncuar penalisht zyrtarët e përfshirë në dhënien me koncesion të procesit të sterilizimit. Ata kanë kërkuar hetimin e zyrtarëve duke nisur nga ish ministri i Shëndetësisë, Ilir Beqaj, të cilët sipas tyre kanë abuzuar me buxhetin e shtetit.
