Kreu i PD-së Sali Berisha dhe ai Partisë së Lirisë, Ilir Meta firmosën këtë të enjte marrëveshjen e përbashkët për zgjedhjet lokale, që do të mbahen në 14 maj të 2023.
Teksa u pyet se sa bashki mendon se do të fitojë Partia e Lirisë, Ilir Meta tha se PL nuk e sheh marrëveshjen me PD si marrëveshje për pushtet dhe se synimi im koalicionit mes dy partive është që të rikthejnë demokracinë te qytetarët.
Në sa prej bashkive është e gatshme PD të tërheqë kandidatë që t’i lërë terren PL-së në Primare? Sa bashki mendoni se do t’i dhuroni koalicionit të 14 majit?
Sali Berisha: Çdo gjë mbi bazën e kuadrit të marrëveshjes do përcaktohet nga grupet e zbatimit të marrëveshjes. Një gjë është e sigurt, që marrëveshja synon fitoren. Kjo është marrëveshja e fitores. Shkoni e mbani pak një konferencë të pala tjetër. Nuk del dot. Ta marrë Erionin, Edi Rama në krah dhe të dalë të thotë se si hyjnë në këtë fushatë.
Ilir Meta: Nga ana ime mund t’ju them, përsa i takon Partisë së Lirisë, objektivi kryesor është çmontimi i këtij regjimi monist dhe ndëshkimi i tij nga të gjithë qytetarët, që nga ata që përjetuan tmerrin e shembjes së Teatrit me artistët brenda, deri tek qytetarët e Tropojës e Sarandës. Ne nuk e shohim si marrëveshje për ndarje pushtetesh. Për ne ka rëndësi të kthejmë besimin tek qytetarët. Marrim këtë angazhim madhor për çështjen e referendumit. Është një garanci historike dhe do të realizohet patjetër, për asnjë parti nuk do të ketë asnjë shqetësim. Do të gjendet mënyra më e mirë.
