Dy ditë pas prezantimit të paketës anti-krizë, nga ana e qeverisë Rama ku u bë e ditur edhe rritja e çmimit të energjisë elektrike, zv.kryeministrja Belinda Balluku çudit me deklaratën e radhës.
Gjatë fjalës së mbajtur në forumin energjitik të vendeve të Europës Juglindore ministrja e energjisë Belinda Balluku theksoi se tashmë fokusi i qeverisë është në përfundimin e projekteve që do të sigurojnë energji nga burime të rinovueshme. Sipas saj, Shqipëria synon që të transformohet në një eksportuese neto e energjisë elektrike deri në 2030.
“Aktualisht kemi në progres një sërë projektesh të rëndësishme për prodhimin e energjisë elektrike siç janë dy parqet fotovoltaike, hidrocentrali i skavicës,termocentralet me gaz të lëngshëm apo eksplorimet e SHELL për rezervat e gazit. Ne synojmë që në vitin 2030 të rrisim kapacitetin prodhues deri në 4 terravat duke e transformuar Shqipërinë në një eksportuese neto të energjisë elektrike. Kjo do të ofrojë siguri energjitike edhe për vendet e rajonit,” tha Balluku.
