“Shqiptarët, duan të emigrojnë në Britani, sepse siç thonë, duan të fitojnë para. Ata e dinë që kalimi nga Bilbao është i vështirë, por jo i pamundur”.
Janë këto fjalët e reporterit të BBC-së, Gavin Lee në një reportazh të realizuar në Bilbao, vendin që tashmë konsiderohet një Calais i ri.
Emigrantët që tentojnë të kalojnë nga ky vend për t’u futu në Angli janë të moshave të reja dhe kryesisht vijnë nga Shqipëria, Afganistani dhe Siria.
Ata ndalohen disa herë nga policia, megjithatë tentojnë sërish të futen ilegalisht të hyjnë në Britani përmes Spanjës.
“Vij nga Calais, pasi qëndrova për një vit atje, por pa mundur të shkoj në Londër. Tani erdha në Spanjë dhe provova që këtej por sërish nuk ia dola dot. Më patën thënë që është më lehtë që këtej, sot më kapën, por do të provoj përsëri“, thotë një i ri nga Afganistani.
300 metra nga porti, janë ngritur edhe çadrat modeste, ku emigrantët qëndrojnë, në pritje për t’u nisur drejt Britanisë. Sipas policisë spanjolle, në këto çadra kamp janë rreth 70 të rinj, shumica dërrmuese e të cilëve nga Shqipëria.
