Ish-kreu i Agjencisë Kombëtare të Bregdeteve, Auron Tare, thotë se Shqipëria nuk ka një strategji të qartë për turizmin.
Për “Ora e Betit” ai ngre shqetësimin e mungesës së promovimit të turizmit kulturor, duke ironizuar se jemi katandisur në festa me fërgesë e gjela deti.
“Para një jave ne bëmë një event në Leskovik. Një event që u bë me një kosto minimale. Me ndihmë nga Bashkia e Kolonjës, më një ndihmë nga qytetarët e Leskovikut. Ishte një event për muzikën e vjetër të Leskovikut, një event që u shfrytëzua dhe për promovim të turizmit të zonës. Dhe aty do të kuptoje sa të uritur janë njerëzit për kulturë. Me të vërtetë për kulturë jo për tekno në kalanë e Gjirokastrës, këto festat me fërgesë me gjela deti e kanë kthyer çdo gjë në banalitet mendoj unë me të gjithë paratë e shumta për gjetjen e sloganeve. Ende Shqipëria lundron në një det të trazuar të promovimit. Nuk ka një fokus të qartë”, tha Tare.
