Ministria e Kulturës së Shqipërisë, me mbështetjen e rajonit të Pulias, të Qendrës së Kulturës Shqiptare, të Fondacionit Gramsci të Pulias dhe Botimeve Besa, merr pjesë zyrtarisht në Sallonin e librit të Torinos .Ministrja e Kulturës, Mirela Kumbaro, do të udhëheqë delegacionin në Torino. Ajo tha se prania në Sallonin e Librit nënvizon vullnetin për të forcuar bashkëpunimin kulturor me Italinë dhe për t’i dhënë jetë një programi aktivitetesh për ta bërë të njohur kulturën dhe letërsinë përtej Adriatikut, me vëmendje të veçantë ndaj brezave të rinj të shkrimtarëve.
“passaPORTO, slogani i Shqipërisë në Sallonin e Librit të Torinos nënvizon idenë që kultura përveç se është pasaporta jonë e identitetit, na lejon të kapërcejmë kufijtë e të komunikojmë me kulturat e tjera. Në këtë kuptim, letërsia si shprehi më e gjallë e më autentike e kulturës së një vendi, është mënyra më e mirë për të bashkuar lidhje të vërteta të bazuara mbi “vlerat e nxehta”, ato të dashurisë, miqësisë, poezisë dhe historisë”, tha ajo.
Tema e emigrimit dhe në veçanti fenomeni i letërsisë shqiptare në gjuhën italiane, do të jetë në qendër të disa veprimtarive. Të shtunën më 14 maj, në Sallën “Babel” të Librarisë Ndërkombëtare, do të zhvillohet aktiviteti “Përtej kufijve të ujërave e fjalëve”. Të rrëfesh kufijtë, të rrëfesh vendin tënd e atë përballë në fjalë e imazhe me pjesëmarrjen e shkrimtarëve Anilda Ibrahimi dhe Alessandro Leogrande, regjisori Roland Sejko, Benko Gjata, gazetar dhe president i Qendrës së Kulturës Shqiptare dhe Mimoza Hysit, përkthyese letrare dhe Drejtore e Librit në Ministrinë e Kulturës së Shqipërisë.
Të dielën më 15 maj, po në sallën “Babel”, aktiviteti “Nga një vend në tjetrin, nga një gjuhë në tjetrën; shkrimtaria si pasaportë” do të zhvillohet me praninë e shkrimtarëve Carmine Abate, Arben Dedja dhe Visar Zhiti.
Në pasdite në Stendën e Rajonit të Pulias është parashikuar aktiviteti mbi temën “Letërsia shqiptare emigruese në gjuhën italiane, në të cilën do të marrin pjesë Natale Parisi i Fondacionit Gramsci të Pulias, Daniele Comberiati nga Universiteti i Montpelierit dhe drejtor i revistës “Crocevia”, shkrimtari emigrues Arben Dedja dhe gazetarja dhe shkrimtarja Luisa Ruggio si moderatore. Ky event përfaqëson një etapë në përgatitjen e Kuvendit mbi Letërsinë Migratore e parashikuar në qershor në Pulia e do të shohë ndërhyrjen e Rosella Santoro-s, drejtore artistike e festivalit “Libri i mundshëm” e Polignano a Mare dhe studentët e Liceut “Cartesio di Triggiano”.
