The Telegraph publikon numrat e fluturimeve ajrore
Nga aeroporti i vetëm i Shqipërisë, Rinasi në vitin 2014 janë kryer 1995 fluturime. Kjo shifër e krahasuar me vendet e tjera të rajonit është dukshëm më e ulët. Gazeta britanike The Telegraph që ka bërë një klasifikim botëror të fluturimeve ajrore, tregon se vendi ynë ka disa herë më pak fluturime se fqinjët. Kështu nga Mali i Zi, ndonëse me një numër shumë më të vogël banorësh kryhen në vit 6621 fluturime, nga Serbia 31,956 fluturime, nga Greqia 109,682 fluturime në vit, ndërkohë që nuk ka të dhëna për Maqedoninë.
Sipas gazetës mesatarisht në një ditë ka më tepër se sa 100 mijë fluturime, ose në një vit kryhen mbi 36.5 milion fluturime. Bazuar edhe në të dhënat e 2014 nga Banka Botërore, SHBA udhëheqin në botë me numrin e fluturimeve, me 9,553,214 fluturime nga aeroportet e tyre, e dyta është Kina me 3,356,756 fluturime në vit. Shteti me më pak fluturime në botë është Çadi, me vetëm 75 të tilla në vit.
