Banorët: “Presim të bëhet zgjidhje e problemit tonë”
Bashkia e Tiranës cdo ditë po gjendet përpara një proteste të qytetarëve. Sot banorët që preken nga ndërtimi i Bulevardit të ri të Tiranës kanë dalë para Bashkisë duke kërkuar takim me kryetarin Erion Veliaj për shpronësimin e shtëpive të tyre. Ata kanë akuzuar bashkinë se po punon me 2 standarde duke i kërkuar Veliajt të ulet me ta për të zgjidhur çështjen. Shumë të indinjuar banorët thanë se ky kryetar për të cilin kanë votuar po iu merr jetën. “Presim të bëhet zgjidhje e problemit tonë. Veliaj po punon me 2 standarde. Po na sjell letrat për të prishur shtëpinë. Po na merr jetën tonë. E kemi votuar dhe po na merr shtëpitë. Të na trajtojë si palë, jemi qytetarë autoktonë të Tiranës. I bëj thirrje të vijë të ulet, ne jemi paqësorë”, tha një qytetar protestues.
Banorët kanë kërkuar që bashkia të çojë një grup pune në terren dhe të bëjë verifikimin për banesat dhe tokat e tyre për t’i shpronësuar më pas me çmimin e tregut.
