Më në fund, kjo përfaqësuese Shpresa, që aktualisht drejtohet nga Redi Jupi, është skuadra më shpresdhënëse, e cila të bën të besosh se Kombëtarja e Shqipërisë do të ketë të ardhme. Flitet për një grup të përbërë nga një numër i konsiderueshëm futbollistësh shumë të talentuar, një pjesë e mirë e të cilëve aktivizohen në klube të huaja, madje si asnjëherë më parë, vlera në treg e ekipit llogaritet në 8.5 milionë euro. Aktualisht skuadra renditet e dyta në grupin e saj, por këtu nuk flitet për kualifikim, gjë që e konfirmon edhe tekniku Jupi, por për një skuadër që mund të furnizojë Kombëtaren A të De Biazit. Kështu, Milot Rashica dhe Rei Manaj e kanë gjetur që tani një vend tek të mëdhenjtë dhe me shumë gjasa do të jenë në Francë për finalet e Euro 2016… Por ka edhe të tjerë që kanë ngjallur intresin e trajnerit Italian. Dhe për të pasur një skuadër me kaq futbollistë që të imponojnë vëmendje kemi pritur plot 32 vjet. Në eleminatoret e Euro 1984 kishim një skuadër të përbërë kryesisht nga ata që u bënë yjet e Kombëtares në eleminatoret e Botërorit të Meksikës që startuan një vit më pas, tw cilwt për herë të parë dhe të vetme e kualifikuan Shqipërinë deri në çerekfinale të aktivitetit, duke u eleminuar më pas nga Italia me dy humbje 0-1 dhe 1-0. Sa për statistikë, përfaqësuesja e atij edicioni e mbylli grupin në vendin e parë me 10 pikë (4 fitore 2 barazime 0 humbje), e ndjekur nga Gjermania Perëndimore me 9 pikë, Turqia 3 pikë dhe Austria 2 pikë.
