Kjo që drejtohet nga Redi Jupi është një skuadër që premton shumë, ndërsa ne vetëm duhet të presim pak me durim. Shqipëria U-21 ka arritur një fitore të madhe në “Elbasan Arena” ndaj moshatarëve hungarezë, me një lojë që në pjesën e dytë tregoi më së shumti edhe një forcë karakteri. Pjesa e parë nisi keq, por më pas tanët balancuan gjithçka, duke u bërë të besueshëm. Bare, Çekiçi, Rei Manaj, apo edhe Latifi e shtynë skuadrën përpara, duke u kthyer në zotër të shtëpisë. Ndërsa në pjesën e dytë, pas një pasigurie në mbrojtje, në momentet tona më të mira janë hungarezët që shënojnë me anë të Geras në të 55’, por edhe i ndihmuar nga një largim jo i pastër i topit prej Hoxhallarit. Më pas gjithçka ishte e jona, pothuajse çdo pjesë e fushës, duke përfshirë në disa raste edhe zonën e portjerit mik.
Në të 68’, Liridon Latifi godet mirë, por topi i ndërpritet në vijën fatale nga një mbrojtës hungarez, ndërsa pas sekonda më pas jep një assist për Rei Manajn që shënon golin e barazimit. As një minutë më vonë është futbollisti i Olimpiakos, Qazim Laçi, i cili kishte një shans ideal, por që nuk e mund dot portjerin Gergeli Nagi. Por duket se goli ynë do të ishte vetëm çështje kohe dhe është fillimisht Manaj që sjell atmosferë Serie A me lëvizjet në zonë, ndërsa në të 79’, Latifi bën një tjetër harkim perfekt nga krahu i majtë i sulmit tonë dhe Herdi Prenga, qendërmbrojtësi që më parë ka luajtur me përfaqësueset e moshave të Kroacisë i jep fitoren Shpresave, që i mban ende në vendin e dytë në kuotën e 12 pikëve, një më shumë se Izraeli. Kjo e fundit fitoi po dje 0-1 në Greqi, por ne kemi luajtur dy ndeshje më shumë se ndjekësit tanë. Tashmë skuadra e Jupit do të ketë një kalendar shumë të vështirë, pasi dy takimet e fundit do t’i luajë në Greqi më 2 shtator, për t’i mbyllur eleminatoret më 10 tetor në Izrael.
