Kategoria e personave të verbër në Shqipëri haset gjithmonë me vështirësi. Mirëpo duket se ata gjejnë mënyra për ta lehtësuar jetën e tyre.
Emiliano Lule nga Insituti Visum ka qenë i ftuar ditën e sotme në ‘ABC e Mëngjesit’, ku ka folur rreth një aplikacioni të krijuar nga Apple, i cili i ndihmon të verbërit të përdorin celularin. Ai gjithashtu i ka bërë thirrje shtetit që ta financojë në gjuhën shqipe, pasi jo të gjithë dinë anglisht.
“Për aq kohë sa sot rrjetet sociale janë informacion, komunikim, pasi aty informohemi, merren lajmet e reja. Unë kam një vit që nuk shoh televizor. Postimi ka dy pjesë, atë çfarë do shkruash që të mos nxjerrësh tezen dhe hallen. Ndërkohë pjesa e dytë është të dish ta përdorësh se më ka ndodhur që kam bërë një postim shumë të gjatë, po nuk kam ditur ta postoj. Ama jo të gjithë dinë anglisht, dhe ne për këtë na duhet një suport. Gjithë ky shtet mund të kishte gjetur një mënyrë të fuste gjuhën shqipe në aplikacion. Në rastin tuaj emrin Bora ose Sibora e kupton, nëse është emër tjetër më i komplikuar nuk e lexon si psh. Xhevdet”, tha Emiliano.
Nga ana tjetër në një lidhje direkte nga Kosova një tjetër i verbër Hashim Llumnica ka treguar se ka përkthyer një aplikacion android për të gjithë personat shqipfolës. Ai është pa pagesë dhe mund të ndihmojë si një pikë mbështetëse për të gjithë, por që prap ka nevojë për më shumë.
“Në Kosovë dhe në Shqipëri ka prej atyre që përdorin platformën android, por duke njohur një mungesë jam munduar të krijojë një apkikacion që t’i ndihmojë. Unë e përdor android dhe ato që kam përkthyer janë prej tij. Kështu një person i vetëm mund ta përdor atë pa një shoqërues. Ka goxha persona që e përdorin dhe numri është rritur. Në këtë aplikacion kam futur zëra nga Shqipëria, Kosova dhe Maqedonia, si për shembull tregon orën fikse.Të gjithë aplikacionet që kam përkthyer gjenden falas në rrjetet sociale. Unë duke pas parasysh nevojën time, por edhe pasioni për teknologjinë më ka bërë që ta krijojë këtë aplikacion”, u shpreh Hashimi. /abcnews.al
