Kryetari i Bashkisë Shkodër, Bardh Spahia ka reaguar në lidhje me dy shpërthimet që kanë tronditur qytetin mesnatën e shkuar. Në një deklaratë publike ai ka thënë se këto vepra kriminale prishin imazhin e qytetit dhe rrisin pasigurinë, prandaj iu ka kërkuar institucioneve përgjegjëse që të zbardhin menjëherë dinamikën e ngjarjes dhe të kapin autorët. Ndër të tjera Spahia ka thënë se këto ndodhin për shkak se krimi ka marr peng qeverinë, por Shkodra nuk përkulet përpara krimit
“Dënoj me forcë aktet kriminale që tronditën Shkodrën mëngjesin e kësaj të shtune. Skena të tilla, kriminale me eksploziv, ndaj banorëve të Shkodrës, jo vetëm dëmtojnë imazhin e këtij qyteti por rrisin frikën dhe pasigurinë e shkodranëve për të jetuar dhe punuar në qytetin e tyre. Ftoj institucionet ligjzbatuese, Policinë dhe Prokurorinë, të zbardhin në mënyrë urgjente këto ngjarje kriminale, që nuk janë të Shkodrës, por të krimit që ka marrë peng qeverinë! Shkodra nuk i përkulet krimit”, u shpreh Spahia. Kujtojmë se në Shkodër ndodhën dy shpërthime në 5 minuta, ku një prej qendrave tregtare ishte në pronësi të ish-kandidatit Xhemal Bushati.
