Ish-deputeti i LSI-së Petrit Vasili ka njoftuar sot se një skandal që ka ndodhur në Sistemin Elektroenergjitik shqiptar po mbahet fshehur nga qeveria.
Vasili është shprehur se një autostransformator në Tiranë, një nga nyjet kryesore të sistemit ka shpërthyer.
Nënkryetari i LSI-së shkruan se pasojat qytetarët do ti ndjejnë gjatë dimrit kur të jenë pa drita, pasi sipas tij instalimi i një nënstacioni të ri kërkon rreth 8 muaj kohë.
“Largimi i profesionistëve në sistemin energjitik po sjell katastrofa tepër të rënda për qytetarët dhe për financat e shtetit. Rasti më i fundit pak orë më parë është shpërthimi i autotransformatorit 320 MVA, AT 1 në nenstacionin e OST, Tirana 2. Arsyeja e këtij shpërthimi është se nuk reagon mbrojtja e linjës Tirana 2 – Podgoricë dhe për këtë shkak, tensioni kalon vlerën 445 kV. Në këtë mënyrë Shqipëria humbet një nga nyjet më të rëndësishme të transformimit.
Nyja doli nga puna për shkak të operimit të sistemit në nivele absolutisht të palejuara të tensionit. Kjo ka sjellë për pasojë, dëmtimin e izolacionit dhe ka sjellë rënien në lidhje të shkurtër. Autotransformatori që ka shpërthyer është prodhim italian i kompanise Tamini. Ky nënstacion mjaft i rëndësishëm është ndërtuar në vitin 2011.
Pasoja që bie mbi qytetarët është se gjatë dimrit, ata do të jenë pa drita, pasi instalimi i një nënstacioni të ri kërkon rreth 8 muaj kohë. Problemi po mbahet fshehur nga qeveria. Presim tani të dëgjojmë shpjegimet e çmendura të kryeministrit, por përpara çdo gjeje presim të na shpjegojë se si u larguan profesionistët, duke lënë sistemin në duart e sharlatanëve, pasojat e të cilëve i vuajmë ne të gjithë.”- shkruan Vasili.
