Kompania e sigurimeve shitet për 2.2 miliardë lekë
Kompania Eurosig është fituesja e tenderit për shitjen e kompanisë shtetërore të sigurimeve INSIG. Një nga vendimet e djeshme të qeverisë ka qenë edhe miratimin e procedurës së tenderimit për shitjen e paketës së aksioneve prej 100 për qind, të zotëruara nga shteti në shoqërinë INSIG. Këshilli i Ministrave ka shpallur EUROSIG, një tjetër kompani që operon në tregun e sigurimeve dhe që kishte ofertën më të lartë prej 2.2 miliardë lekë, në garën e zhvilluar më 10 mars. Në garë kanë qenë edhe tre kompani të tjera por që ofruan më pak. Kastrati dhe Albsig kishin një ofertë prej 1,5 miliardë lekë, Balfin shpk me 1,65 miliardë lekë dhe Recovered Earth Technologies & Duraku 2,15 miliardë lekë.
Kjo ka qenë hera e tretë që INSIG ishte nxjerrë në shitje, dy herë më parë dështoi dhe duket se me këtë shitja ka marrë fund odiseja disavjecare për shitjen e kësaj kompanie. INSIG operon në tregun e sigurimeve në tre shtete, Shqipëri, Kosovë e Maqedoni. Në Shqipëri ka dy licensa, një për sigurimet e jetës dhe një për sigurimet e jojetës. Por administrimi i dobët shtetëror ka bërë që kompania në shumë vite me radhë vetëm të humbiste peshë në tregun e sigurimeve.
