Ministria e Arsimit deklaron zyrtarisht se mesditën e 28 gushtit ka nisur afishimi i studentëve të rinj në fakultete.
Zv ministri i Arsimit, Gert Janaqi, njofton se aplikantët duhet t’i drejtohen portalit “U-Albania”, tek i cili do të ndjekin në kohë reale renditjen e pikëve, shanset për të fituar në fazat e ardhshme dhe procesin e regjistrimit.
“Portali aktovizohet nesër. Nëpërmjet butonit “click” te “Këndi i Maturantit” mund të hyhet me ID-në e maturantit. Është një portal që fotografon dhe tregon renditjen e fituesve në kohë reale. Nëse vija është e kuqe, kur ajo bëhet jeshile kandidati mund të regjistrohet”, deklaron Janaqi.
Por zv.ministri u kërkon maturantëve vëmendje.
“Brenda 48 orësh do të duhet të regjistrohen, ndryshe humbasin të drejtën për t’u regjistruar në raundin e dytë. Deri më 11 shtator ky proces do të vijojë në kohë reale. Për të gjithë ata që s’janë regjistruar për një arsye apo një tjetër do të kenë një shans të dytë. Kjo periudhë fillon më 15 shtator”, saktëson Janaqi.
