Biznesmeni i njohur Nikollaq Neranxi është shoqëruar në komisariatin nr. 6 në Tiranë pasditen e së shtunës. Ai ishte shpallur më herët në kërkim nga policia rreth orës 16:00, por vetë Neranxi u dorëzua pak më vonë në komisariat. Pas kësaj, policët kanë tentuar ta shoqërojnë por janë penguar nga dy rojet e tij të cilët janë shoqëruar në ambientet e Komisariatit të Policisë nr. 6. më pas policia njoftoi dhe për shoqërimin e Nikollaq Neranxit.
Biznesmeni ka deklaruar për Ora News se është ndaluar padrejtësisht pasi po kërkohet t’i dëmtohet biznesi. Ai tha se është provokuar në kohën kur ka qenë në panair ku kishte shumë të ftuar. Sipas Neranxit, ky është një sulm politik dhe policia ka gjetur ditën e sotme për ta mbajtur edhe të dielën në komisariat pasi është ditë pushimi. Nikollaq Neranxi është President i Shoqatës për Mbrojtjen e Tregtarëve dhe të Tregut të Shqipërisë dhe mjaft aktiv në publik muajt e fundit. Ai ka qenë edhe deputet i Kuvendit të Shqipërisë.
