Policia lokale ka shoqëruar mëngjesin e sotëm tre punonjës të Ndërmarrjes së Gjelbërimit në qytetin e Pogradecit gjë që ka sjell përplasje mes bashkisë dhe policisë. Burimet bëjnë me dije se shtetasit e shoqëruar janë Qani Nurka, Altin Rushiti dhe Kristo Pura. Ata janë akuzuar për prerjen e pemëve në bulevardin qendror të këtij qyteti. Menjëherë pas shoqërimit të tre punonjësve ka reaguar ashpër Bashkia e Pogradecit, duke kërkuar lirimin e menjëhershëm të tyre. Sipas bashkiakëve, tre punonjësit e Ndërmarrjes së Gjelbërimit ishin në krye të detyrës dhe po krasisnin pemët përgjatë bulevardit, me qëllim sistemimin dhe zbukurimin e tij në prag të çeljes së sezonit turistik. Nga ana tjetër, burime nga Policia e Pogradecit deklaruan se punonjësit e ndërmarrjes që varen nga bashkia nuk kishin marrë leje për prerjen e pemëve.
POLICIA
Burime konfidenciale të policisë së Pogradecit bëjnë me dije se: “Tre punonjës të Ndërmarrjes së Gjelbërimit në Pogradec janë kapur duke prerë pemët në bulevard. Punonjësit e Gjelbërimit u shoqëruan në komisariat dhe u morën në pyetje, pasi kanë prerë pemët pa kriter. Ata u lanë të lirë pasditen e djeshme. Institucioni i bashkisë duhej të kërkonte leje pranë policisë për sa i përket prerjes së pemëve, gjë e cila nuk ka ndodhur. Punonjësit, me urdhër të eprorëve të tyre kanë vijuar prerjen pa kriter të pemëve shumëvjeçare. Situata rëndohet edhe më tepër, pasi prerja e pemëve ka ndodhur në bulevardin e qytetit. Prerja e pemëve nga ana e bashkisë është bërë në kundërshtim të plotë me ligjin, për të shfrytëzuar lulishtet për dhënie me qira në hesap të xhepave të drejtuesve të këtij institucioni”.
BASHKIA
Në deklaratën e Bashkisë së Pogradecit thuhej se: “Shoqërimi i tre punonjësve të Gjelbërimit është i padrejtë, pasi ata janë shoqëruar në krye të detyrës. Bashkia e Pogradecit dënon ashpër ndalimin e 3 punonjësve të Ndërmarrjes së Gjelbërimit nga Policia e Shtetit. Sot (dje), në përmbushje të detyrës së tyre, punonjësit Kristo Pura, Qani Nurka dhe Altin Rushiti janë shoqëruar pranë Komisariatit të Pogradecit. Vërejmë se punonjësit e bashkisë ishin në krye të detyrës duke krasitur pemët përgjatë bulevardit kryesor, i cili prej ditësh po sistemohet për të qenë gati në hapjen e sezonit turistik. Bashkia e Pogradecit u është drejtuar zyrtarisht Prefektit dhe Policisë për këtë tejkalim të kompetencave të Policisë së Shtetit dhe kërkojmë lirimin e tyre të menjëhershëm. U bëjmë me dije qytetarëve se Bashkia e Pogradecit është në gatishmëri të plotë për t’i dhënë qytetit të gjithë përgatitjen e duhur për të pasur një sezon turistik sa më të mbarë dhe se askush nuk do ta pengojë bashkinë në misionin e saj për t’u shërbyer qytetarëve”.
