Banka e SHqipërisë: Reforma në Drejtësi me rëndësi për ekzekutimin e kolateraleve
Shoqata e Bankave radhit një sërë pengesash të natyrës ligjore dhe të tregut për pengesat që po has ekzekutimi i pasurive të lëna peng në banka për kreditë që nuk janë kthyer në afat. Shoqata e Bankave deklaron se, një faktor po aq i rëndësishëm sa zbatimi i legjislacionit është shmangia e pengesave që vihen re në veprimtarinë e disa institucioneve publike apo të gjyqësorit, gjatë zbatimit të ligjit. Por problemi më me shumë ndikim është çështja e tregut të pasurive të paluajtshme. Sipas shoqatës së bankave, informaliteti që e ka mbërthyer atë, mungesa e një indeksi zyrtar të pasurive të paluajtshme, paaftësia blerëse apo kërkesa e ulët në treg janë kthyer në pengesa të mëdha për sistemin bankar. Shoqata kërkon që pranë gjykatave të mëdha të krijohet një seksion i veçantë që të merret me gjykimin e kolateraleve.
Bankat janë në një fazë intensive të ekzekutimit të kolateraleve me vlera të mëdha të tilla si City Park, kompleksi Tropikal, por shitja e tyre po bëhet e vështirë për shkak të proceseve të stërzgjatura në gjykata. Shoqata Shqiptare e Bankave ka ndërmarrë disa iniciativa apo propozime lidhur me nevojën për ndryshime në kuadrin ligjor. Kështu janë kërkuar Ndryshimet në Kodin e Procedurës Civile:
për sa i përket nevojës për krijimin e një seksioni në gjykatat e rretheve, i cili të gjykojë në kohë më të shkurtër dhe brenda afateve ligjore, çështjet me objekt ekzekutimin e kolateraleve. Po ashtu janë kërkuar ndryshimet e nevojshme në ligjin “Për regjistrimin e pasurive të paluajtshme”, me synimin e rritjen e sigurisë juridike për palët e treta.
