Prej tre vitesh shkolla 9-vjecare në fshatin Tregan të Elbasanit nuk hap dyert për të mirëpritur nxënësit e saj. Shkak u bë tërmeti i tre viteve më parë, i cili e dëmtoi ndjeshëm godinën e kësaj shkolle. Edhe pse pushteti lokal në mënyrë të vazhdueshme ka premtuar një shkollë të te, sërish edhe këtë vit nxënësit nuk mund të marrin dije në këtë shkollë. Ata udhëtojnë çdo ditë për të ndjekur mësim në fshatin Kuqan”.
Gati 170 fëmijët e kopshtit dhe nxënës të 4 fshatrave në njësinë administrative Tregan, në bashkinë e Elbasanit e kanë nisur vitin e ri shkollor jo në shkollën e tyre, por 5 km më larg, në shkollën e fshatit Kuqan. Shkolla 9-vjeçare, “Jonuz Çarçiu”, në Tregan u cilësua jo funksionale nga Komisioni i Verifikimit, pas tërmetit që përfshiu vendin nëntorin e vitit 2019.
Që nga ajo kohë shkollës iu vu dryni dhe nxënësit u dërguan në turnin e dytë në shkollën e fshatit tjetër. Ndonëse kanë kaluar gati tre vite nga ajo kohë, asnjë masë nuk është marrë. Prindër dhe gjyshër shprehen të shqetësuar për nisjen e vitit të ri shkollor. Për ta është e pamundur që veçanërisht fëmijët e arsimit fillor të dërgohen të vetëm në një fshat tjetër në turnin e dytë.
“Ku ti çojmë fëmijët ,kemi pyetur çdo vit dhe nuk marrim përgjigje”.
Edhe pse transporti mbulohet nga pushteti lokal, fëmijët transportohen jashtë kushteve , në një fugon pa ajër të kondicionuar dhe tej kapacitetit.
“Mos ti çojmë më fëmijët në shkollë, është skandal, më mire ti marrim fëmijët dhe ikim të gjithë jashtë, shkolla është atje të vijnë ta rregullojnë, në një autobus hipin 100 fëmijë, shihe autobusin”.
Referuar shkollës në Tregan, nënkryetarja Vesa Liço, pohon se “ Aktualisht nxënësit janë transferuar në Kuqan, ku Bashkia e Elbasanit ka mundësuar për nxënësit si dhe për stafin mësimor linjat e dedikuara të transportin, çka është mirëpritur edhe nga vetë prindërit, ndërsa transporti paguhet nga Zyra Vendore Arsimore. Sa i përket rikonstruksionit të shkollës së Treganit, Bashkia ka një projekt, dhe është në pritje të financimit”.
