Një biznesmen është gjetur i vrarë me armë zjarri mesditën e sotme në periferi të qytetit. Viktima është Arjan Ferracaku 30 vjeç, ndërsa nga të dhënat e para mësohet se është qëlluar me kallashnikov. Arjan Ferracaku është gjetur i pajetë pranë një makine të djegur rreth orës 14:00. Por të dhënat e para janë kontradiktore nëse makina e djegur ka lidhje me ngjarjen.
Mësohet se viktima po bënte xhiro me kalë në momentin kur është qëlluar me kallashnikov. Ferracaku ka qenë i shoqëruar nga dy persona të tjerë, të cilët ndodhen në komisariatin e Shkodrës.
Arjan Ferracaku është pronar i dy bizneseve në Velipojë, ndërkohë që mësohet se Ferracaku, është djali i pronarit të firmës së plastikës dhe duraluminit Ferracaku në Shkodër, Kujtim Ferracakut. Arjan Ferracaku është babai i dy fëmijëve të mitur. Ferracaku është pronari i hotel “Fantazia“ në Velipojë, që në zone përdoret edhe si orientim. 30-vjeçari, posedon edhe një restorant në Zus, sapo kalon urën e re të Bunës.
