Firma që po kryen zbatimin e projektit “Veliera” në qytetin e Durrësit, ka vijuar punimet dhe ka mbushur me beton pilotat për ngritjen e themeleve, pavarësisht vendimit të Gjykatës Administrative për pezullimin e këtyre punimeve në pjesën e sipërme. Betoni i derdhur ka shkuar deri pranë gjetjeve arkeologjike dhe shumë pranë murit rrethues të qytetit.
Zbatimi i projektit “Veliera” në qytetin e Durrësit, përveç kritikave se po ndërtohet një shesh luksoz, me vlerë 6 milionë dollarë, vuri përsëri në provë Ministrinë e Kulturës dhe Bashkinë Durrës, mbi aftësinë e saj për të ruajtur gjetjet arkeologjike.
Themelet e një godine të periudhës osmane, dy topa lufte dhe disa dhjetëra predha sferike guri për hedhje me katapultë ishin gjetjet arkologjike që rrezikonin të zhdukeshin, pasi mbi to ishin ngulur pilota për ngritjen e themeleve të “Velierës”.
Pas ankesës për pezullimin e punimeve për këtë shesh që u bë nga shoqëria civile, e cila ju bashkua një javë më parë marshimit-protestë të qytetarëve të Durrësit, kundër punimeve për ndërtimin e sheshit “Veliera” pranë gjetjeve arkeologjike, Gjykata Administrative Durrës, me datë 16 shkurt 2017, vendosi pezullimin e punimeve në pjesën e sipërme të projektit.
Pikërisht, në pjesën ku u zbuluan gjetjet arkeologjike dhe që përcaktohet si zonë arkeologjike e kategorisë A, gjë që nuk lejon asnjë ndërtim në këtë zonë.
Por ditën e sotme, 20 shkurt 2017, firma që po kryen zbatimin e projektit ka vijuar punimet dhe ka mbushur me beton pilotat që do të shërbejnë për ngritjen e themeleve të “Velierës”. Betoni ka shkuar deri pranë gjetjeve arkeologjike dhe shumë pranë murit rrethues të qytetit, mbuluar përgjatë kryerjes së punimeve.
Betoni ka shkuar deri pranë gjetjeve arkeologjike dhe shumë pranë murit rrethues të qytetit, mbuluar përgjatë kryerjes së punimeve.
/amfora.al/
